किंजळीची मध्यम उंचीची (१० ते ३० मी.) झाडे गावात सर्वत्र सामान्यप्रमाणात आढळतात. उतारावरील जंगलभागात विशेष करून हे झाड आढळते. खोड काळेकुट्ट असून पाने मध्यम आकाराची लांबट असतात. पावसाळा अखेरीस किंजळीला पांढरा मोहोर येतो व त्यामागोमाग लाल रंगाच्या फळांनी झाड बहरते. डिसेंबर ते मे या काळात लालभडक फळलेल्या किंजळी गावात फिरताना दृष्टीस पडतात.
गावात घराच्या बांधकामासाठी विशेष करून किंजळीचा उपयोग केला जातो. किंजळीचे लाकूड आतून लालसर असते. घराचे वासे, आडं, बडोद, रिपा, इंद्राटी, फळ्या, पोटसर, दरवाज्यांच्या चौकटी, इ. भाग बनवण्यासाठी किंजळीचे लाकूड उत्तम!
किंजळीचे मोठे वृक्ष गावात फार तुरळक राहिले आहेत.

अधिक माहितीसाठी संदर्भ –

1) मराठी विश्वकोश (https://vishwakosh.marathi.gov.in/16987/)

2) फ्लॉवर्स ऑफ इंडिया (https://www.flowersofindia.net/catalog/slides/Kindal%20Tree.html)

धामणीची मध्यम उंचीची (१० ते ३० मी) झाडे गावात डोंगरउतारावरील भागात तसेच सड्यांच्या अवतीभवती सामान्य प्रमाणात आढळतात. स्थानिक लोकांकडून काठ्या बनवण्यासाठी, तसेच दोर काढण्यासाठी धामणीच्या खोडाचा उपयोग केला जातो. उन्हाळाअखेर या वृक्षाला पांढऱ्या-पिवळ्या रंगाची बारीक फुले येतात व पावसाळ्यात बारीक टपोरी हिरवी फळे येतात.