भेरली माडाचे मध्यम उंचीचे (३० ते ५० फूट) वृक्ष गावात तुरळक प्रमाणात आढळतात. स्थानिक भाषेत ‘सुरमाड’ या नावानेही हा वृक्ष ओळखला जातो. गर्द हिरव्या झावळ्या, सरळ उभे दंडगोलाकृती खोड व झुंबरासारख्या फुलं-फळांचा घोस यावरून हा वृक्ष सहज ओळखू येतो. सुरमाडाच्या बारीक सुपाऱ्या लोक दगडाने फोडून खातात. झावळ्यांचा उपयोग गणपतीच्या सजावटीसाठी होतो. कांडेचोर, वाघळं, धनेश पक्षी या झाडाची फळं आवडीने खातात.
