कुंभ्याची लहान ते मध्यम उंचीची झाडे गावात तुरळक प्रमाणात आढळतात. मोठा वृक्ष आढळात नाही. जळवणासाठी व भाजावळीसाठी कुंभ्याचे कवळ (बारक्या फांद्या) तोडले जातात. घराचे वासे वा फळ्या पाडण्यासाठी कुंभ्याचे लाकूड वापरतात. उन्हाळ्यात एप्रिल-मे च्या सुमारास कुंभ्याच्या झाडाला पांढरी मोठी भरपूर केसरे असलेली फुले येतात. फळे हिरवी मोठी असतात. पान मोठे लंबवर्तुळाकार असते. पाने पिकल्यावर लाल होतात. काही भागांमध्ये पत्रावळी लावण्यासाठी कुंभ्याची पाने वापरतात.
