अणसुरे गावातील हुर्से वाडी येथील धनेश (Malbar Pied Hornbill) या पक्ष्याचे घरटे स्थानिक लोकांच्या सहभागातून संरक्षित केले गेले आहे. हुर्से वाडी येथील एका रायवळ आंब्याच्या झाडावर धनेश पक्षी दरवर्षी घरटे बांधतो. धनेश पक्षी हा बीजप्रसारावाटे जंगलनिर्मितीमध्ये खूप मोठी भूमिका बजावणारा पक्षी आहे. मोठे वृक्ष व जंगलांची तोड झाल्यामुळे यांचे अधिवास धोक्यात आले आहेत. सह्याद्री निसर्गमित्र संस्थेचे राम मोने यांच्या मार्गदर्शनाने ग्रामस्थांनी हे झाड राखण्यास तयारी दर्शविली व त्यामुळे येथे असलेले धनेशाचे घरटे संरक्षित झाले आहे. जानेवारी ते मे च्या दरम्यान दरवर्षी धनेशाची मादी झाडाच्या ढोलीत अंडी घालते व सुमारे पाऊण महिना घरट्यात बसून राहते. यादरंयान नर तिला खाद्य पुरवतो. हुर्सेवाडी येथील ग्रामस्थ बंडू धुरी या झाडाची देखभाल करतात.

अणसुरे गावात खालच्या वठारातील वाडेकरवाडी येथे ‘भावकाई’ नावाचे जुने देवस्थान आहे. येथे छोटे मंदिर उभारलेले आहे. या मंदिराच्या आजूबाजूच्या सुमारे तीन ते चार गुंठे परिसरात एक देवराई पाहायला मिळते. 

येथे एक पायरीचा व एक पिंपळाचा असे दोन महावृक्ष आहेत. याशिवाय सुरंगीची ११, आष्ट्याची २, वडाचे १, बकुळीची २, सळसळ्याचे १, चिंचेची २ अशी वृक्षराजी येथे आढळते. भर दुपारीही गर्द सावली असणारे असे हे ठिकाण आहे. देवस्थान असल्यामुळे जुनी वृक्षराजी जपली गेली आहे. 

अणसुरे गावचे ग्रामस्थ यशवंत गावकर व मोहन गावकर, तसेच अन्य ग्रामस्थ या देवस्थानची देखभाल करतात. दरवर्षी होळीच्या दिवशी गावकऱ्यांकडून येथे नारळ ठेवला जातो. भावकाई ही नवसाला पावणारी देवी म्हणून प्रसिद्ध असून अनेक ग्रामस्थ कौल लावण्यासाठी या देवस्थानला भेट देतात. ग्रामस्थांच्या सहभागाने या देवराईचे जतन-संवर्धन होणे गरजेचे आहे.