दांडे-पंगेरे समुद्रकिनारा हे अणसुरे गावातील एक नयनरम्य ठिकाण आहे. गावाची संपूर्ण पश्चिम हद्द ही समुद्रकिनाऱ्याने वेढलेली आहे. येथून समोर सुमारे २० किलोमीटर अंतरावर असलेला विजयदुर्ग किल्ला दिसतो. पूर्वी पंगेऱ्यातून विजयदुर्ग किल्ल्यावर जाण्यासाठी ‘छबिना’, म्हणजेच इंजिनची होडी असायची, परंतु आता सागरी महामार्ग झाल्यामुळे हे छबिने बंद झाले आहेत. समुद्रकिनाऱ्याची लांबी सुमारे ९०० मीटर आहे, तर रुंदी (पुळणीचा भाग) सुमारे ३०० मीटरपर्यंत आहे. त्यापुढे खोल समुद्र सुरु होतो.
किनाऱ्यावरची वाळू काळपट राखाडी रंगाची आहे. सागरी महामार्गाच्या गावाकडील बाजूला उंडिलाची झाडे आढळतात, तर किनाऱ्याकडील बाजूला सुरुच्या झाडांची लागवड अलीकडे झाली आहे. ‘मर्यादवेल’ (Ipomoea pes-caprae) ही किनाऱ्याची धूप रोखणारी कोकणातली अत्यंत महत्त्वाची वनस्पती या ठिकाणी भरपूर प्रमाणात पसरलेली आढळते. याशिवाय ‘खुळखुळा’ (Crotalaria verrucosa) हे झुडुपही वाळूलगत मोठ्या प्रमाणावर आढळते.
खुळखुळा (Crotalaria verrucosa)
छोट्या खेकड्यांनी वाळूत पडलेली भोके
खेकडा
दांडे-पंगेरे समुद्रकिनारा पर्यटनदृष्ट्या महत्त्वाचे ठिकाण आहे. अणसुरे गावातील, तसेच आजूबाजूच्या गावांमधील अनेक लोक संध्याकाळच्या वेळी विरंगुळा व मजेसाठी समुद्रकिनाऱ्यावर येतात. पाण्यात डुंबण्याचा आनंद घेतात. लोकांनी प्लास्टिकच्या बाटल्या अस्ताव्यस्त टाकू नयेत यासाठी प्लास्टिक संकलकाची व्यवस्था करण्यात आली आहे.