पंगेरे खाडीवर मुख्य रस्त्याचा एक बांध घातलेला आहे व त्याखाली पाणी जाण्या-येण्यासाठी मोऱ्या बसवलेल्या आहेत. या मोऱ्यांच्या सभोवताल सुमारे २० फूट रुंदीच्या भागात लाकडी खांब व बांबूच्या काठ्यांचे छायाचित्रात दाखवल्याप्रमाणे बांधकाम करून त्याला जाळी बसवलेली आहेत. या रचनेला ‘डोळी लावणे’ असे म्हणतात. दोन खांबांमधले अंतर साधारणतः २ ते ३ फूट असते व प्रत्येक भागात एकेक जाळे लावलेले असते. भरती-ओहोटी सुरु असताना पाणी इकडून तिकडे वाहत असते तेव्हा या जाळ्यात मासे अडकतात. पूर्ण भरती आल्यावर जेव्हा पाणी स्थिर होते तेव्हा लोक जाळ्यांमध्ये अडकलेले मासे काढून घेतात. डोळी कोणी लावायची, त्यात अडकलेले मासे कोणी काढून घ्यायचे हे लोक आपापसांत ठरवून घेतात.