१. भावकाई

अणसुऱ्याच्या गावठाण भागात कणेरी-वाडेकर वाडीजवळ भावकाईचे एक छोटे मंदिर आहे. या मंदिराच्या सुमारे १८ गुंठे परिसरात एक राई आहे. पिंपळ आणि पायरीचे दोन महावृक्ष येथे आहेत. सळसळ्याचा (शिरीष) एक मोठा वृक्ष आहे. सुरंगीची लहान, मध्यम व मोठ्या आकाराची एकूण १७ झाडे येथे आहेत. याशिवाय वड, आष्टा, काजरा, बकुळ, खुरई, किंजळ, धामण, मोवई, कुंभा, चिंच यांची मध्यम आकाराची झाडे येथे आहेत. देवस्कीसाठी, कौल लावण्यासाठी लोक येथे येतात. बाकी कोणता सण-उत्सव येथे होत नाही.